Hamdden/Siopa

Hamdden

Mae cyfleusterau hamdden Wrecsam yn cynnwys pwll nofio a chanolfan hamdden a foderneiddiwyd yn ddiweddar, ei chae ras ei hun ym Mangor Is y Coed, stadiwm athletau, stadiwm bêl-droed newydd, theatr a sinema aml-sgrîn.

Ceir dewis rhagorol o westai, rhai'n cynnig llety ac addurn cyfnod atyniadol. Mae sawl bwyty a chaffi-bar da hefyd. Mae gan Wrecsam ddau eiddo Ymddiriedolaeth Genedlaethol ysblennydd - Erddig a Chastell y Waun ac amgueddfa ac oriel gelf fach. Amgylchynir Wrecsam gan gefn gwlad annisgwyl o dlws - da ar gyfer cerdded - ac mae Afon Dyfrdwy yn enwog am ei physgota. Am dref eithaf bychan, mae Wrecsam yn uchelgeisiol iawn yn y ffordd mae'n hyrwyddo'i hun drwy weithgareddau hamdden sydd â chanolbwynt rhanbarthol neu genedlaethol. Mae ganddi Wyl Gelf reolaidd, mae'n cynnal Rali Vauxhall Cymru ac mae hefyd yn gartref Gwyl Ryngwladol Gwyddoniaeth a Thechnoleg Wrecsam.

Lleolir Wrecsam o fewn taith 20 munud o Eryri - un o Barciau Cenedlaethol enwocaf y DU. Mae Eryri ei hun yn cynnig posibiliadau diddiwedd ar gyfer gweithgareddau hamdden awyr agored ac, ynghyd â Chanolbarth Cymru ac ardaloedd cyfagos Gogledd Orllewin Lloegr, mae'n rhaid bod yr ardal yn darparu ar gyfer bron bob gweithgaredd awyr agored posibl. Mae'r arfordir hefyd yn hawdd i'w gyrraedd ac eto mae rhywbeth i blesio pawb o fewn taith rwydd o Wrecsam.

Fel tref eithaf bychan, mae Wrecsam yn ddi-os yn elwa o'i hagosrwydd at nifer o brif ddinasoedd sy'n ddigon mawr i gael y math o gyfleusterau y gellir eu cynnal gan ganolfannau poblogaeth mawr yn unig. Mae dinas hynafol Caer yn ddim ond 12 milltir i ffwrdd a gellir cyrraedd dinasoedd Lerpwl a Manceinion o fewn awr. Rhwng y rhain, mae'r tair dinas hon yn cynnig y gorau mewn cerddoriaeth, theatr, bale a'r celfyddydau - ar sail barhaol a rheolaidd. Mae lleoliad canolog Wrecsam hefyd yn ei gwneud yn bwynt cychwyn delfrydol ar gyfer pobl sy'n chwilio am fynediad i'r amrywiaeth gynyddol eang o weithgareddau hamdden sydd ar gael drwy'r gogledd-orllewin a Gogledd Canolbarth Lloegr.

Cyswllt i gwybodaeth bellach hamdden

Siopa

Mae Wrecsam, fel y nodwyd eisoes, yn Brif Ganolfan Siopa yng Ngogledd Cymru. Mae ganddi gymysgedd da o siopau bychain preifat a siopau cadwyn cenedlaethol mawr. Mae dau ddatblygiad canol tref newydd gwerth miloedd o bunnoedd a pharc adwerthu da allan o'r dref. O safbwynt siopwyr lleol mae Wrecsam wedi gwella'n ddifesur yn y blynyddoedd diwethaf ac mae'r tuedd yn parhau. Bydd yn wastad y dewis cyntaf am siopa bob dydd i bobl a ddenir o ardal eang iawn ac mae'n gallu delio fwyfwy â galw am nwyddau mwy arbenigol. Fodd bynnag, wrth i siopa ddod yn fwy o weithgaredd hamdden, mae'n rhaid wynebu'r ffaith bod siopwyr yn disgwyl mynd ymhellach ac mae pobl Wrecsam yn teimlo'n ffodus mewn cael cymaint o ddewis o ganolfannau adwerthu y gellir mynd atynt yn rhwydd yn y siroedd cyfagos. Tra nad yw perchnogion siopau Wrecsam o bosibl yn gwerthfawrogi hyn, mae'n rywbeth sy'n ychwanegu at atyniad Wrecsam fel lle i fyw ynddo.

Mae pobl Wrecsam yn hoff iawn o Gaer, oherwydd ei hagosrwydd a'i chyfaredd ganoloesol ac oherwydd y nifer helaeth o siopau arbenigol bychain a siopau cadwyn mawr sydd ganddi. Ar raddfa llawer yn fwy, mae gan Lerpwl a Manceinion amrywiaeth lawn o fannau gwerthu ardderchog a gellir cyrraedd y ddwy yn rhwydd â char neu drên.

Yn unol â'r tuedd cynyddol am siopa allan o'r dref, mae nifer o ddatblygiadau parciau adwerthu mawr yn y gogledd-orllewin. O sylw arbennig mae Parc Adwerthu Broughton yn Sir y Fflint gerllaw (yn dal yng Nghymru) a'r Designer Outlet Village ger Ellesmere Port yn Sir Gaer.