Gwasanaethau A-Y

Gwneud Cais Am Dy

Cwblhau Ffurflen Gais

Os ydych am wneud cais am dy, rhaid i chi gwblhau ffurflen gais am dy a’i dychwelyd at un o swyddfeydd tai lleol y Cyngor. Os bydd angen unrhyw gymorth pellach arnoch wrth gwblhau’r ffurflen, mae pob croeso i chi ofyn.

Mae’n bwysig iawn eich bod yn cwblhau’r ffurflen hon mor llawn a chywir â phosibl. Byddwn yn defnyddio’r wybodaeth hon i benderfynu faint o bwyntiau y mae gennych hawl i’w derbyn.

I gefnogi’ch cais am dy, rhaid i chi ddarparu tystiolaeth o’ch enw, eich cyfeiriad a’ch amgylchiadau presennol, er enghraifft unrhyw gyflyrau meddygol sydd gennych neu fynediad at blant. Mae’r ffurflen yn cynnwys manylion yr hyn sydd ei angen arnom. Ni allwn dderbyn eich cais os na fyddwch yn darparu’r wybodaeth hon.

Os canfyddwn eich bod wedi rhoi gwybodaeth ffug neu gamarweiniol ar eich ffurflen gais yn fwriadol a’ch bod yn dod yn denant o ganlyniad i hynny, byddwn yn cymryd camau cyfreithiol i ddod â’ch tenantiaeth i ben.

Penderfynu lle'r ydych am gael eich ailgartrefu

Rydym am roi cymaint o ddewis i chi ag sy'n bosibl ynghylch lle'r ydych am fyw. Gellwch ddewis cymaint o ardaloedd yn y fwrdeistref ag y dymunwch, y math o eiddo sydd ei angen arnoch a'i faint.

Y math o eiddo a'i faint

O ganlyniad i'r lleihad parhaus yn nifer y tai y mae'r Cyngor yn eu rheoli, rhaid i ni wneud y defnydd gorau o'r tai sydd ar gael. Am y rheswm hwn, mae gennym reolau mewn perthynas â maint yr eiddo a gynigir i bobl fel rheol. Cyfeiriwch at y tabl isod wrth ddewis y math o eiddo sydd ei angen arnoch.

Math o Deulu	Math o Eiddo
Unigolyn sengl	flat un ystafell Fflat ag 1 llofft Tŷ ag 1 llofft
Unigolyn sengl â mynediad at blant	Fflat ag 1 llofft Fflat â 2 lofft**
Cyplau heb blant	Fflat un ystafell Fflat ag 1 llofft Fflat deulawr ag 1 llofft Tŷ ag 1 llofft Fflat â 2 lofft Fflat deulawr â 2 lofft Tŷ a 2 lofft**
Teuluoedd sy'n disgwyl plentyn ac sydd heb unrhyw blant eraill	Fflat â 2 lofft Fflat ddeulawr â 2 lofft Ty â 2 lofft
Teuluoedd ag 1, 2 neu 3 o blant	Fflat â 2 neu 3 llofft Fflat deulawr â 2 neu 3 llofft Ty â 2 neu 3 lloft
Teuluoedd â 4 neu fwy o blant	Fflat â 3 neu 4 llofft Fflat deulawr â 3 neu 4 llofft Ty â 3 neu 4 llofft
Unigolyn sengl/Cwpl dros 60	Tŷ cysgodol Fflat un ystafell Fflat ag 1 neu 2 lofft Fflat deulawr ag 1 neu 2 lofft Byngalo ag 1 neu 2 lofft Tŷ ag 1 neu 2 lofft
Teuluoedd sydd ag ymgeisydd ag anabledd corfforol sydd angen mynediad gwastad, neu dŷ wedi ei addasu yn dibynnu ar natur unrhyw anabledd neu salwch meddygol ac sy’n cael ei gefnogi gan anghenion Iechyd a Gofal Cymdeithasol.	Tai wedi eu haddasu sy'n addas i’w hanghenion neu dai y gellir eu haddasu. Gallai hyn gynnwys eiddo sy'n "addas" i bobl hŷn, tai cysgodol neu fyngalos.

Nodwch: Canllaw cyffredinol yn unig yw’r rhestr uchod a gall amrywio yn sgil galw lleol, cyflenwad neu unrhyw bolisïau gosod lleol.

** bydd eiddo â 2 lofft yn cael eu dyrannu i unigolyn sengl sydd â mynediad at blant, ddim ond os nad oes galw gan ymgeiswyr sydd â chyfrifoldebau gofal plant parhaol.

Fe'ch cynghorir i fod yn realistig wrth ddewis eiddo ac ardal. Os ydych

Byddwch yn ymwybodol bod y cyflenwad tai mewn rhai rhannau o'r fwrdeistref yn brin. Gwneir cynigion i'r ymgeiswyr hynny sy'n gallu gwneud y defnydd gorau o'r eiddo, er enghraifft, fel rheol, ni fyddwn yn cynnig ty 3 llofft i unigolyn sengl.

Gweler ein taflen wybodaeth "Dewis Ardal" ddiweddaraf i weld lle mae ein tai a sut rai ydynt, faint a ddaeth yn wag yn y 12 mis diwethaf a faint o bobl sydd ar y rhestr aros.

Tai Cysgodol

Rydym yn rheoli nifer o unedau tai cysgodol yn y fwrdeistref. Mae nifer o'r unedau hyn yn ennill budd o gefnogaeth warden preswyl neu ddibreswyl, larwm cymunedol a/neu tai addasedig i bobl sydd â phroblemau symudedd.

Fel rheol, rhentir y tai hyn i:

ymgeiswyr dros 60 oed, neu sydd â phartneriaid sydd dros 60 oed
ymgeiswyr anabl sydd angen y math hwn o lety.

Dywedwch wrthym ar eich ffurflen gais os ydych am i ni eich ystyried ar gyfer y math hwn o eiddo.

Os bydd lle gwag ar gael mewn ty cysgodol ac nad oes unrhyw ymgeiswyr priodol ar y rhestr aros, byddwn yn ystyried ymgeiswyr addas eraill sydd ar y rhestr aros gyffredinol yn ôl eu hoedran h.y. yr ymgeiswyr hynaf yn gyntaf. Bydd gofyn i denantiaid newydd mewn tai cysgodol gael cymorth gan y gwasanaeth wardeiniaid e.e. ymweliad dyddiol.

Eiddo sy'n "addas" i bobl hyn

Mae rhai o'n tai wedi'u haddasu'n arbennig ar gyfer ymgeiswyr anabl. Pan ddaw'r tai hyn yn wag, byddwn yn ceisio dod o hyd i ymgeisydd a all ddefnyddio'r cyfleusterau hyn.

Os ydych eisoes yn un o denantiaid y Cyngor, efallai y gallwn ddarparu addasiadau yn eich tŷ presennol i ddiwallu anghenion eich teulu. Cysylltwch â'ch swyddfa dai leol i gael mwy o wybodaeth neu gofynnwch am gopi o’n taflen “Addasu eich Cartref”.

Eiddo Addasedig

Mae rhai o'n tai wedi'u haddasu'n arbennig ar gyfer ymgeiswyr anabl. Pan ddaw'r tai hyn yn wag, byddwn yn ceisio dod o hyd i ymgeisydd a all ddefnyddio'r cyfleusterau hyn.

Os ydych eisoes yn un o denantiaid y Cyngor, efallai y gallwn ddarparu addasiadau yn eich ty presennol i fodloni anghenion eich teulu. Cysylltwch â'ch swyddfa dai leol am fwy o wybodaeth.

Ymgeiswyr Digartref

Os ydych yn ddigartref a bod gennym ddyletswydd gyfreithiol i'ch helpu, bydd gofyn i chi ledu eich dewisiadau er mwyn ystyried mathau o dai y mae mwy ohonynt ar gael.

Bydd gofyn i chi ystyried unrhyw ardal yn y fwrdeistref sirol. Os na fyddwch yn cael cynnig ty ar ôl 4 wythnos, byddwch yn cael eich ystyried am unrhyw dy yn y fwrdeistref sirol. Byddwch hefyd yn cael eich ystyried ar gyfer enwebiadau cymdeithasau tai fel mater o drefn.

Gweler yr adran Derbyn a Gwrthod Cynnig yn nes ymlaen yn y llyfryn hwn.

Ceisiadau gan Denantiaid Presennol y Cyngor

Croesawir ceisiadau gan denantiaid presennol y Cyngor sydd am symud i dy mwy addas yn y fwrdeistref sirol.

Fel rheol, bydd raid i ymgeiswyr fod yn denantiaid sicr i Gyngor Bwrdeistref Sirol Wrecsam cyn gwneud cais i drosglwyddo, oni bai nad yw'r eiddo bellach yn bodloni eu hanghenion e.e. oherwydd newid i amgylchiadau'r teulu, rhesymau iechyd ac ati.

I gael eich ystyried am hyn, ni ddylech fod wedi torri unrhyw rai o amodau'ch tenantiaeth. Mae hyn yn cynnwys:

cofnodion o ymddygiad gwrthgymdeithasol
bod y tu mewn i'ch ty mewn cyflwr gwael o ran atgyweiriadau ac addurniad yr ydych chi'n gyfrifol amdanynt
bod eich gardd mewn cyflwr gwael

Byddwch yn cael gwybod yn ysgrifenedig beth sydd angen i chi ei wneud i gael eich ystyried ar gyfer trosglwyddo.

Os oes gennych ddyledion sy'n gysylltiedig â'r ty, ôl-ddyledion rhent, taliadau ychwanegol yn ddyledus i ni, byddwch yn cael llai o flaenoriaeth ar y rhestr aros trwy dynnu pwyntiau cosb (gweler yr adran Asesu eich Pwyntiau yn y llyfryn hwn).

Polisïau Gosod 'Lleol'

Mae'r polisïau hyn yn nodi'r mathau o dai y gellir eu dyrannu i ardal benodol. Rhaid iddynt gydymffurfio â deddfwriaeth a chyfarwyddyd cydraddoldeb ac ni ddylent wahaniaethu yn erbyn unrhyw grwp, boed hynny'n uniongyrchol neu'n anuniongyrchol.

Rhaid i ni roi ffafriaeth resymol hefyd i'r ymgeiswyr hynny o fewn y grwpiau dethol fel y pennwyd gan Ddeddf Ddigartref 2002.

Rydym wedi cyflwyno nifer o bolisïau gosod 'lleol' sydd ar waith ar gyfer:

Cynllun cefnogaeth i bobl sydd ag anawsterau dysgu
Llety i bobl hyn â chynllun cefnogaeth
Eiddo sy'n "anodd eu rheoli"

Gall eich swyddfa dai ddarparu mwy o wybodaeth am p'un a fyddwch yn gymwys i gael y math hwn o lety ai peidio.

Taflen Gwneud Cais Am Dy

Taflen Gwneud Cais Am Dy - fformat PDF 407Kb

Ffurflen Gais Am Dy

Mae'r ddogfennau ar gael ar y ffurfiau canlynol:

Ffurflen Gais Am Dy - fersiwn Word 589Kb

Ffurflen Gais Am Dy - fersiwn PDF 532Kb

I weld ac argraffu ffeiliau pdf, rhaid i chi osod Adobe® Acrobat® Reader: cliciwch y logo isod i ddadlwytho'r meddalwedd.

Gellir newid dogfennau Adobe Acrobat yn ôl i destun plaen trwy ddefnyddio'r Accessible Adobe® Reader.

I weld ac argraffu ffeiliau Microsoft Word, rhaid fod Microsoft Word wedi ei sefydlu ar eich cyfrifiadur neu gallwch ddadlwytho Meddalwedd Gwyliwr Microsoft Word: cliciwch y logo isod i ddadlwytho'r meddalwedd.