Newid i'r Digidol

Byddwch yn barod i Drosglwyddo i Deledu Digidol

Gyda dim ond blwyddyn ar ôl tan y newid i deledu digidol yng Nghymru mae Digital UK yn trefnu digwyddiadau mewn sioe deithiol yn ystod y misoedd nesaf i gynnig cyngor ymarferol i unrhyw un sydd am wybod mwy am drosglwyddo i deledu digidol yn eu hardal.

Daw’r sioe deithiol i Wrecsam ddydd Sadwrn 20fed Medi 2008 a bydd yn Tesco Extra, Ffordd y Cilgant, Wrecsam.  Bydd y sioe deithiol a’r offer yn rhoi cyfle i bobl gael profiad ymarferol o’r offer teledu digidol sydd ar gael ar hyn o bryd.

Mae Digital UK yn edrych ymlaen at ateb eich cwestiynau yn y digwyddiad ar 20fed Medi.  Mae rhagor o wybodaeth am drosglwyddo i deledu digidol ar gael ar y wefan hon drwy ddilyn y ddolen isod www.digitaluk.co.uk/cy.

Beth yw Newid i'r Digidol?

Rhwng 2008 a 2012, bydd gwasanaethau teledu'r DU yn troi'n gyfan gwbl ddigidol. Gelwir y broses hon yn Newid i'r Digidol.

Bydd y broses hon yn golygu diffodd y rhwydwaith trawsyrru teledu daearol analog sydd wedi bod mewn bodolaeth ers y 1930au a rhoi rhwydwaith daearol cwbl ddigidol yn ei le. Ar hyn o bryd, caiff signalau digidol ac analog eu darlledu'n gyfochrog. Ond tra bo'r signal analog yn dal i weithredu, ni ellir darlledu'r signal digidol yn llawn gan ddefnyddio pŵer llawn ledled y DU a galluogi pawb i dderbyn signal digidol.

Mae'r broses hon yn digwydd er mwyn rhoi manteision gwasanaethau teledu digidol i bob cartref yn y DU a bydd hefyd yn galluogi'r Llywodraeth ac Ofcom i wneud mwy o le i donnau awyr a lansio gwasanaethau newydd yn y dyfodol, megis teledu diffiniad uchel (HDTV).

Dros y blynyddoedd diwethaf, mae manteision teledu digidol wedi trawsffurfio'r ffordd yr ydym yn gwylio teledu yn y DU. Mae wedi dod â llawer mwy o sianeli, gwella ansawdd y llun, darparu ffyrdd newydd o ddarparu gwasanaethau a gwell opsiynau mynediad i'r rhai hynny â nam ar eu golwg a'u clyw.

Bydd newid i'r digidol yn digwydd fesul rhanbarth teledu a 2009 yw'r flwyddyn y bydd HTV Wales, Granada, BBC1 Wales ac ati yn newid i'r digidol yng ngogledd Cymru. Er mwyn bod yn barod ar gyfer y broses hon, ac os nad ydych wedi gwneud hynny eisoes, bydd angen trosglwyddo eich offer teledu i rai digidol. I wneud hyn, mae gennych 4 opsiwn:

• Prynu blwch digidol a'i blygio yn eich teledu (mae'r rhain yn integredig mewn rhai setiau teledu newydd erbyn hyn).
• Tanysgrifio i wasanaeth cebl digidol
• Tanysgrifio i wasanaeth lloeren digidol
• Tanysgrifio i wasanaeth sy'n darparu teledu digidol trwy linell ffôn

Gwerthfawrogir na fydd pob un o'r gwasanaethau hyn ar gael yn eich ardal a thrwy ddefnyddio'r gwirydd côd post ar www.digitaluk.co.uk (gweler y cyswllt isod) gellwch ddarganfod beth yw eich opsiynau. Fel arall, gellwch gael cyngor gan unrhyw fanwerthwr trydanol a chwiliwch am arwydd y tic digidol sy'n nodi bod ganddynt nwyddau neu wasanaethau i helpu pobl i newid i'r digidol.

Am wybodaeth fanwl bellach a chwestiynau a ofynnir yn aml am Newid i'r Digidol, defnyddiwch y linciau a ddangosir isod.

Cysylltau

www.digitaluk.co.uk/cy (sy'n cynnwys gwirydd côd post i weld pa wasanaethau sydd ar gael yn eich ardal)

www.digitaltelevision.gov.uk