Newyddion y Cyngor

14.05.04

Cynigion datblygu arloesol wedi’u dewis ar gyfer Dôl yr Eryrod

Mae Bwrdd Gweithredol Cyngor Wrecsam wedi dewis datblygiad cyffrous ac arloesol fydd yn newid gwedd Dôl yr Eryrod, Wrecsam.

Gwnaed y cynnig, sy’n werth sawl miliwn o bunnoedd, gan y datblygwyr Wilson Bowden a’u partneriaid Bernard Engle, Penseiri.

Bydd y trawsffurfiad yn cynnwys siop adrannol ac ali fowlio, yn ogystal â lle ychwanegol ar gyfer manwerthu, caffes a bwytai a fflatiau preswyl, fydd yn rhoi bywiogrwydd newydd i’r ardal. Mae’n rhan arall o’r jig-so sydd wedi gweld Wrecsam yn trawsffurfio o fod yn dref farchnad draddodiadol i fod yn ganolfan fanwerthu o bwysigrwydd rhanbarthol. Bwriedir dargyfeirio’r gylchffordd fewnol (gan gynnwys yr hyn a adnabyddir yn lleol fel trosffordd Asda) er mwyn gwella llif y traffig a hygyrchedd fel rhan o’r ailddatblygiad.

Bydd y cynllun pwysig hwn yn dod â 225,000 troedfedd sgwâr o arwynebedd llawr ar gyfer manwerthu, a bydd y siop adrannol yn llenwi 85,000 troedfedd sgwâr o arwynebedd llawr ar gyfer manwerthu. Mae’r dyluniad cysyniadol yn cynnwys llwybrau i gerddwyr a marchnadfaoedd, gan ddod â bywyd dinesig i Wrecsam. Bydd y defnydd o leoedd parcio ar gyfer dros 1000 o gerbydau ar lefel y llawr, gyda lefelau’r adeilad wedi’u codi i gydfynd â’r strydlun cyfagos yn mwyhau’r cysylltiadau â chanol y dref.

Dôl yr Eryrod oedd lleoliad yr archfarchnad Asda flaenorol, ac fe’i defnyddir ar hyn o bryd fel maes parcio.

Dywedodd Paul Roberts, Cyfarwyddwr Strategol Cyngor Bwrdeistref Sirol Wrecsam: “Derbyniasom sawl cyflwyniad rhagorol yn rhoi cynigion i newid wynebwedd y rhan hon o Wrecsam. Fodd bynnag, roedd y syniadau, y dyluniadau a’r weledigaeth a gynigiwyd gan Wilson Bowden a’r pensaer Bernard Engle yn arbennig. Roedd Aelodau yn ystyried eu cynigion yn arloesol a ffres – datblygiad fydd yn trawsffurfio’r rhan hon o’r dref ac yn sail i adfywiad parhaus Wrecsam.”

Dywedodd y Prif Weithredwraig, Isobel Garner: “Rydym yn falch iawn bod gweithrediadau manwerthu a hamdden o safon wedi dangos ffydd ym mhotensial Wrecsam. Mae hon yn rhan arall o’r jig-so ar gyfer trawsffurfiad canol tref Wrecsam, ac mae ein trigolion a’n hymwelwyr yn ei haeddu. Mae Wrecsam eisoes yn ganolfan fasnachol a manwerthu hynod lwyddiannus, a gallai’r cynnig diweddaraf wneud dim ond cynyddu ein safle yn Genedlaethol. ”

Dywedodd Nick Richardson, Rheolwr Gyfarwyddwr Wilson Bowden Developments: “Rydym yn falch iawn o gael ein dewis gan Gyngor Bwrdeistref Sirol Wrecsam i gyflawni ein gweledigaeth ar gyfer Dôl yr Eryrod. Credwn y gallwn helpu Wrecsam i adeiladu ar lwyddiannau diweddar a gwella’r dref ymhellach fel lleoliad adloniadol a manwerthu.
“Rydym hefyd yn gweld potensial sylweddol i ddarparu fflatiau preswyl dinesig, ac rydym yn llawn cyffro i fod yn gweithio ochr yn ochr â Chyngor Bwrdeistref Sirol Wrecsam ar y prosiect hwn.”

Dywedodd Chris Wieszczycki o Bernard Engle Architects: “Mae angen i Wrecsam adeiladu ar ei chymeriad atyniadol fel tref farchnad.
“Dyna pam y dyluniwyd ein cynllun o gwmpas cyfres o leoedd trefol, deinamig newydd sydd wedi’u hintegreiddio o fewn rhwydwaith o strydoedd a sgwariau sy’n bodoli eisoes.
“Bydd yr adeiladau gwahanredol newydd yn darparu mynediad trawiadol i ganol y dref.
“Mae ein cysyniad yn cydnabod amlygrwydd Eglwys Blwyf San Silyn gan wneud ei meindwr yn ganolbwynt i’r brif promenâd i gerddwyr.”