Gwasanaethau A-Y

Gwasanaeth Integredig Cymorth i Deuluoedd

Ynghylch cymorth integredig i deuluoedd

Mae’n wasanaeth newydd sy’n anelu at wneud gwahaniaeth i fywydau’r plant a theuluoedd mwyaf diamddiffyn sy’n byw yn Wrecsam.

Bydd yn tynnu gweithwyr proffesiynol o amrywiol gefndiroedd at ei gilydd i roi cymorth dwys, yn enwedig rhoi cefnogaeth rieiniol i oedolion a theuluoedd.

Nod y math hwn o wasanaeth yw peri newid yn nulliau byw teuluoedd i wella lles plant a chadw teuluoedd gyda’i gilydd.

Amdanom Ni

Mae Wrecsam wedi derbyn £1.8 miliwn am y tair blynedd nesaf i dalu am y prosiect newydd hwn. Mae’n un o ddim ond tri Awdurdod yng Nghymru sy’n arloesi’r agwedd amlasiantaethol hon at deuluoedd “cyfan” lle mae camddefnyddio alcohol a sylweddau’n ffactor risg allweddol.

Dros y tair blynedd nesaf bydd Tîm Integredig Cymorth i Deuluoedd Wrecsam yn gweithio’n drylwyr gyda holl aelodau’r teulu, lle mae gan un o’r rhieni neu’r ddau ohonynt broblemau camddefnyddio sylweddau.

Bydd gweithiwr cymdeithasol ymgynghorol yn cael ei benodi i ddechrau arferion gwaith cymdeithasol newydd.

Caiff y ddarpariaeth ei chyflwyno’n drylwyr, hyd at 80 awr dros 4 wythnos, gan gynnwys nosweithiau a phenwythnosau i sicrhau cysylltiad y teulu.

Mae’r tîm yn rhan o Wasanaeth Plant a Phobl Ifanc y Cyngor ac o fewn yr Adran Atal a Chynhwysiad.

Y Buddiannau

Trwy dynnu amrywiaeth o staff medrus ynghyd i gynorthwyo cefnogi teuluoedd, bydd tîm arbenigol, fel yr un sy’n cael ei sefydlu yn Wrecsam, yn gallu cynorthwyo goresgyn yr anawsterau sy’n wynebu teuluoedd.

Mae llawer o blant sy’n ei gorffen hi mewn gofal yn gwneud hynny oherwydd esgeulustod neu gam-drin, yn sgil dibyniaeth eu rhieni ar alcohol neu gyffuriau.

Mae’n bwysig bod rhieni’n cael cymorth dwys i ddod dros eu caethiwed i naill ai gyffuriau neu alcohol a’u plant yn cael eu hamddiffyn.

Bydd y tîm integredig cymorth i deuluoedd yn ceisio sefydlogi bywyd cartref i sicrhau bod plant a rhieni’n gallu aros gyda’i gilydd, gan osgoi gofal maeth neu’r dewis arall o roi’r plentyn mewn cartref gofal.

Os yw hyn wedi digwydd eisoes gall y tîm weithio gyda’r teulu i ddod â’r teulu’n ôl at ei gilydd trwy ddefnyddio gwasanaethau cymdeithasol oedolion a phlant. Fel arall, mae ymyriad yn golygu bod modd cael lleoliadau addas yn gynharach i roi’r cyfle gorau bosibl i blant.

Pam fod y Gwasanaeth Integredig Cymorth i Deuluoedd yn wahanol?

Mae’n wahanol oherwydd nad yw’r tîm yn gyfrifol am achosion teuluoedd unigol, ond mae’n gallu comisiynu gwahanol wasanaethau i wneud newidiadau sylweddol. O ganlyniad nid yw’n drwm dan waith papur statudol fel timau gwasanaethau cymdeithasol cyffredin. Mae’r canolbwynt ar anghenion y teulu dros gyfnod byr a dwys. Mae’r oriau’n hyblyg ar gyfer aelodau’r teulu.

Sut fydd teuluoedd sydd yng ngofal y Tîm Integredig Cymorth i Deuluoedd yn manteisio?

Bydd y tîm yn gweithio gyda holl aelodau’r teulu, gan sicrhau bod cyfathrebu da rhwng pawb.
Meithrin ymddiried rhwng aelodau’r teulu, gan greu teuluoedd mwy sefydlog a thawelach.
Ni fydd teuluoedd yn cael eu trosglwyddo o un gwasanaeth i’r llall gan leihau cyfle i lithro’n ôl rhwng gwahanol ymyriadau.
Caiff y gwasanaeth ei gyflenwi pan fydd yn gyfleus i’r teulu, nid yn unig yn ystod oriau swyddfa, ond hefyd yn yr hwyr ac ar benwythnosau.
Caiff teuluoedd gynnig gwasanaethau nad oedd ar gael o’r blaen gan gynnwys profiannaeth a darparu tai arbenigol.
Bydd teuluoedd yn cael mynediad cyflymach at wasanaethau wedi’u cydgysylltu gan y tîm.
Mae modd asesu newidiadau sydyn mewn sefyllfaoedd teuluol yn gyflym ac ymateb iddynt yn briodol.
Bydd y tîm mewn lle da i weithredu’n gyflym, os bydd angen, i gadw plant yn ddiogel.
Wrth i’r rhaglen ymyrryd, dwys ddod i ben bydd gwasanaethau’n cael eu trosglwyddo i dimau dal achosion. Bydd gweithwyr cymdeithasol wedi cael cefnogaeth a hyfforddiant ychwanegol ac wedi cael eu cyfarwyddo’n llawn ar gynnydd y teulu.

Blaenoriaethau Corfforaethol y Cyngor

Bydd y Gwasanaeth Integredig Cymorth i Deuluoedd yn effeithio ar un o’r tair Blaenoriaeth Gorfforaethol:

Gwell addysg a sgiliau ar gyfer cyflogaeth

Mae hyn oherwydd y gall addysg llawer o’r plant sy’n dod dan IFSS gael ei beryglu, oherwydd amgylchiadau teuluol, a dod yn bobl ifanc sy’n cael eu galw’n NEET – pobl nad ydynt mewn addysg, cyflogaeth na hyfforddiant.

Ei fwriad yw cryfhau’r uned deuluol a chefnogi’r bobl ifanc a chwalu’r pethau sy’n rhwystro cynhwysiad cymdeithasol, gan gynnwys mynediad at addysg a hyfforddiant.

Bydd hefyd yn effeithio ar y meysydd gwella canlynol:

Bwyta’n iach a phobl yn fwy egnïol
Ymddygiad gwrthgymdeithasol, camddefnyddio sylweddau ac amgyffred o drosedd
Mynediad at wasanaethau a gwrando ar y cyhoedd a’u cael i ddylanwadu ar wasanaethau

Am y tro cyntaf bydd cynllun teulu cyfan yn bodoli i ddelio â maetheg a materion dulliau byw egnïol.

Yn aml mae ymddygiad gwrthgymdeithasol a chamddefnyddio sylweddau’n cydfodoli gyda theuluoedd anghenus iawn, o ran yr oedolion hyn a’u plant.

Cynllun y Cyngor

Gwasanaeth Integredig Cymorth i Deuluoedd - fformat PDF 3.5Mb

Gwasanaeth Integredig Cymorth i Deuluoedd - Canllaw'r Ymarferydd - fformat PDF 2.6Mb

I weld ac argraffu ffeiliau pdf, rhaid i chi osod Adobe® Acrobat® Reader: cliciwch y logo isod i ddadlwytho'r meddalwedd.

Gellir newid dogfennau Adobe Acrobat yn ôl i destun plaen trwy ddefnyddio'r Accessible Adobe® Reader.

Dolenni Defnyddiol Allanol

Llywodraeth Cynulliad Cymru - Gwasanaeth Integredig Cymorth i Deuluoedd

Polisi cydweithredol Llywodraeth Cynulliad Cymru yw'r model GICD er mwyn ymateb i'r pryderon nad yw'r gwasanaethau presennol yn bodloni anghenion rhai o'r plant a'r teuluoedd sydd â phroblemau cymhleth yn ddigonol. Bydd y Timoedd Integredig Cymorth i Deuluoedd (TICD) yn weithredol o wanwyn 2010 ymlaen.

| Rhannu

yn ôl i'r brig