Taflen Gyngor 4: Asesiadau COSHH

Mae bellach yn anghyfreithlon defnyddio sylweddau peryglus yn y gwaith os na wnaed asesiad COSHH (Rheoliadau Rheoli Sylweddau sy'n Beryglus i Iechyd 1999). Ym mhob sefyllfa ar wahân i'r symlaf, bydd angen asesiad.

Mae'r camau canlynol yn berthnasol:

1. Rhestru holl sylweddau peryglus

Llunio rhestr o'r sylweddau peryglus a gaiff eu storio, eu defnyddio neu eu cynhyrchu yn y gweithle. Dylai restru beth a gaiff ei storio neu ei gynhyrchu, ar ba ffurf, faint ohono ac yn lle.
Chwiliwch am Symbolau Perygl sy'n nodi bod y sylwedd yn Wenwynig Iawn, Gwenwynig, Cyrydol, Niweidiol neu Lidus. Archwiliwch gynwysyddion heb farc arnynt neu sy'n aneglur, os ydych yn amau bod sylweddau peryglus ynddynt.
Dylech gynnwys llwch, mwg neu sgil-gynhyrchion sydd â Chyfyngiadau Datguddiad a nodir yn EH40.

2. Dysgwch fwy am eu natur peryglus

Gofynnwch i gyflenwyr am daflenni Gwybodaeth am Beryglon. Bydd mwy o wybodaeth yn y rhain ar beryglon, amodau defnyddio a chyngor mewn argyfwng.

yn ôl i'r brig

3. Sut caiff y sylweddau hyn eu defnyddio?

Archwiliwch y broses waith yn ofalus. Rhai pethau sydd angen eu hystyried yw: Cludo a Storio; Paratoi a defnyddio; Gweithgareddau eraill sy'n mynd rhagddynt gerllaw (e.e. glanhau, cynnal a chadw, bwyta, ysmygu ac ati); Gwaredu gwaddodion a chynwysyddion; Digwyddiadau nas cynlluniwyd ac argyfyngau.

4. Beth yw'r perygl y bydd anaf neu salwch?

O'ch gwybodaeth chi o'r sylwedd, y broses waith ac argyfyngau a ellir eu rhagweld, dylech benderfynu beth yw'r tebygolrwydd y bydd rhywun yn cael eu hanafu neu'n dioddef effeithiau i'w iechyd a sut gallai hyn ddigwydd. Dim ond peryglon arwyddocaol sydd angen eu hystyried.
Gall peryglon godi o nifer o ffynonellau, er enghraifft, arllwys a sblasio; cymysgu sylweddau; anadlu llwch a mwg, amsugniad trwy'r croen; llyncu damweiniol.
Ystyriwch pwy sydd mewn perygl, gan gynnwys pobl megis y cyhoedd, ymwelwyr neu gontractwyr, yn ychwanegol i'r staff eu hunain. Mae'r cyfnod y mae person yn gweithio gyda'r sylwedd yn bwysig hefyd.

yn ôl i'r brig

5. Penderfynu ar y rhagofalon

Y ffordd orau i gael gwared â'r risg yn deillio o sylwedd peryglus yw rhoi'r gorau i'w ddefnyddio yn llwyr (dileu) neu ddefnyddio sylwedd arall llai niweidiol (disodli).
Wedyn, ystyriwch symud y rhai sydd mewn perygl o'r man gwaith (amgáu ac ynysu) neu echdynnu mwg a llwch o'r man gwaith (gwanhad ac awyriad lleol).
Dim ond PAN FETHO POPETH ARALL, dylid ystyried amddiffyn y gweithiwr yn uniongyrchol (Offer amddiffynnol personol).
Gelwir y rhagofalon hyn yn Reolaethau a rhaid i chi sicrhau eu bod yn cael eu defnyddio yn briodol, a monitro a chynnal eu heffeithiolrwydd. Mewn rhai achosion, rhaid ystyried goruchwylio iechyd, ond dim ond mewn achosion arbennig.

6. Cofnodi'r asesiad

Oni fo'r asesiad yn syml ac y medrwch gofio ac esbonio'r casgliad ar unrhyw adeg, dylid ei nodi ar bapur. Dylai dangos yn glir pwy sydd mewn perygl a pham, a pha ragofalon sy'n bodoli i leihau'r perygl i lefel resymol.

7. Cyfarwyddo a hyfforddi eich staff

Mae angen dweud wrth staff am natur beryglus sylweddau y maent yn gweithio gyda hwy ac unrhyw berygl sydd iddynt.
Rhaid rhoi cyfarwyddyd a hyfforddiant ar unrhyw ragofalon; mesurau rheoli a'u defnydd priodol; pa offer a dillad amddiffynnol personol sydd eu hangen a sut i'w defnyddio yn briodol.
Rhaid hefyd rhoi hyfforddiant ar Drefniadau Argyfwng i staff.
Cofiwch gadw cofnodion ar bwy sydd wedi derbyn hyfforddiant a phryd.

yn ôl i'r brig

8. Adolygu eich asesiad

Mae angen adolygu'r asesiad yn rheolaidd (o leiaf bob 5 mlynedd). Rhaid adolygu'r asesiad hefyd os bydd newid yn y sylweddau neu'r broses. Dylai'r asesiad nodi pryd ddylid ei adolygu nesaf.

Gwybodaeth bellach:

"Occupational Exposure Limits" (EH40/2000) ISBN 0 7176 0722 4; "COSHH: A brief guide to employers" (IND(G)136L); "COSHH Assessments - A step by step guide" ISBN 0 11 886379 7; "COSHH and peripatetic workers" (HS(G)77) ISBN 0 11885733 9; "COSHH; An open learning course" ISBN 0 7176 0850 6.

Sylweddau Peryglus Eraill:

Mae sylweddau eraill nad ydynt yn dod dan COSHH, ond sydd angen eu hasesu. Mae'r rhain yn cynnwys: Sylweddau Fflamychol a ffrwydrol; Sylweddau ar Dymheredd Uchel ac Isel; Sylweddau Ymbelydrol ac Asbestos. Mae cyfarwyddyd penodol ar gael ar y rhain ac efallai bod deddfwriaeth benodol. Mae plaleiddiad yn dod dan Reolau COSHH, ond mae gofynion cyfreithiol eraill hefyd. Am wybodaeth bellach ar y meysydd hyn, ffoniwch 01244 324324 a gofyn am y Tîm Iechyd a Diogelwch.

yn ôl i'r brig

Taflen Gyngor 4: Asesiadau COSHH