 Gwrychoedd uchel
Deddf Ymddygiad Gwrthgymdeithasol 2003 - Rhan 8
Gall y gwrych cywir fod yn derfyn perffaith i’ch gardd, ac os yw’n cael ei gadw’n dda gallai fod yn nodwedd dirweddol ac ecolegol deniadol a pharhaus mewn ardal drefol. Maent yn diffinio ffiniau eiddo, yn darparu preifatrwydd, cysgod a diogelwch, yn lleihau swn ac yn annog bywyd gwyllt.
Fodd bynnag, gall dewis y gwrych anghywir greu problemau yn y dyfodol. Gall caniatáu i wrych dyfu’n rhy uchel arwain at waith cynnal a chadw anodd a gormod o gysgod i gartrefi cyfagos, gan effeithio ar eu mwynhad rhesymol o’r eiddo.
Crynodeb
- Daeth y ddeddfwriaeth i rym yng Nghymru ar 31 Rhagfyr 2004.
- Mae’r ddeddfwriaeth yn berthnasol i goed bythwyrdd a lled-fythwyrdd yn unig a llwyni sydd dros 2 fetr o uchder o'r ddaear.
- Mae troi at y Cyngor am gymorth yn cael ei ystyried fel y cam olaf yn y broses ar ôl i bob dull arall o ddatrys y broblem fethu. Nid rôl y Cyngor yw darparu gwasanaeth cyflafareddu.
- Mae’r Cyngor yn codi tâl o £320 am bob cwyn, gan gynnig gostyngiad o 50% os ydych yn bensiynwr, wedi’ch cofrestru’n anabl neu’n cael un o fudd-daliadau’r wladwriaeth.
- Gall y naill ochr neu’r llall apelio yn erbyn penderfyniad y Cyngor
Ymholiadau
Pwyntiau allweddol
- Nid yw’n berthnasol i bob gwrych, dim ond y rheiny sy’n bodloni’r diffiniad.
- Dylai achwynyddion droi at y Cyngor pan fetho popeth arall yn unig, gan gynnwys gwasanaeth cyflafareddu.
- Rydym yn codi tâl (£320).
- Mae’r gwasanaeth a ddarperir yn archwilio’r gwrych yn erbyn yr ystyriaethau canlynol ac yn gwneud penderfyniad ynghylch p’un a oes angen gwneud gwaith i’r gwrych ai peidio:- preifatrwydd, cysgod, sŵn, arogl a mŵg, difrod i blanhigion, brigau gordo, sbwriel, atal golau’r haul rhag dod trwodd, rhwystro golygfeydd, llethol/anghymesur.
- Gellir apelio yn erbyn y penderfyniad yn yr un modd â phenderfyniadau cynllunio a cheir broses orfodi hefyd.
Os ydych am wneud cwyn: -
- Dylech siarad gyda Swyddog Coedyddiaeth y Cyngor i weld a yw eich amgylchiadau’n cyfateb i’r ddeddfwriaeth – Ffôn: 01978 292529.
- Gofynnwch am becyn gwybodaeth.
Mae hwn yn cynnwys:
- Ffurflen gwyno
- Nodiadau am sut i lenwi’r ffurflen
- Taflen am ddewis y math o wrych cywir
- Cyflwyno Cwyn am Wrych Uchel gan ddefnyddio’r ffurflen uchod ynghyd â’r ffi briodol
Beth sy’n digwydd ar ôl hynny?
- Cwblheir archwiliad o’r safle.
- Bydd asesiad o effaith y gwrych yn cael ei gwblhau mewn perthynas â’r ystyriaethau a nodwyd gynt.
- Gwneir penderfyniad ynghylch p’un a oes angen gwneud gwaith i’r gwrych ai peidio.
- Pan fo angen gwneud gwaith ar y gwrych, byddwn yn anfon rhybudd atoch sy’n nodi beth sydd angen ei wneud. Bydd y rhybudd hwn yn edrych ar y broblem bresennol a materion sy’n ymwneud ag aildyfu a gwaith cynnal a chadw.
- Gellir addasu’r rhybudd mewn amgylchiadau penodol a gall y derbynnydd, yr achwynnydd neu berchennog y tir (os yw’n wahanol) apelio yn ei erbyn.
Y ddeddfwriaeth
Sefydlwyd cwynion am wrychoedd uchel gan Ran 8 o Ddeddf Ymddygiad Gwrthgymdeithasol 2003.
Cwyno
Os ydych am gwyno, cwblhewch y ffurflen isod a darllennwch y canllawiau sy’n dod gyda hi.
 Ffurflen gwyno: Gwrychoedd uchel
Mae'r ddogfen yma ar gael i ddadlwytho yn y fformat isod:
Ffurflen gwyno: Gwrychoedd uchel - Fersiwn PDF 66Kb 
To view and print PDF files, you must have Adobe® Acrobat® Reader installed: click the logo below to download the software.
Adobe Acrobat documents can be converted back to plain text using Adobe's Online conversion tools for Adobe PDF documents.
Canllawiau ar gyfer cwblhau’r ffurflen gwyno: gwrychoedd uchel
Bwriad y canllawiau hyn yw eich helpu i lenwi’r ffurflen i gwyno am wrych uchel yn agos at eich tŷ. Dylech ddarllen y daflen ‘Gwrychoedd Uchel: Cwyno i’r Cyngor’ hefyd.
Bydd oedi o ran ystyried eich cwyn os na fyddwch yn ei chwblhau’n gywir neu os na fyddwch yn darparu’r wybodaeth y gofynnwyd amdani.
Os ydych yn dal yn ansicr sut i ateb unrhyw rai o’r cwestiynau, ffoniwch 01978 292529 neu anfonwch e-bost at planning@wrexham.gov.uk.
1. Manylion cyswllt
1.1 Yr unigolyn hwn fydd ein prif gyswllt at gyfer unrhyw faterion sy’n ymwneud â’r gŵyn. Byddwn yn cyfeirio unrhyw ymholiadau neu ohebiaeth atyn nhw. A fyddech cystal â chadw hyn mewn cof os gwelwch yn dda.
Mae gofyn i ni anfon rhai dogfennau at berchennog a phreswylydd yr eiddo dan sylw yn ôl y gyfraith. Mae’r rhain yn cynnwys ein penderfyniad am y gŵyn.
1.2 Ticiwch y blwch ‘ydw’ os ydych yn ymgynghorydd proffesiynol, perthynas, ffrind neu gynrychiolydd arall.
1.3 Ticiwch y blwch ‘ydw’ os byddai’n well gennych i ni gysylltu â chi dros yr e-bost. Ni allwn anfon dogfennau atoch yn electronig oni bai eich bod yn cytuno i ni wneud hynny.
2. Eiddo sy’n cael ei effeithio gan y gwrych
2.2 Cadwch y disgrifiad yn gryno. Er enghraifft, fflat uwchben siopau; cartref a meddyfga gyfunol. Rhaid i’r eiddo gynnwys annedd neu ni allwn ystyried y gŵyn.
2.3 Mae angen y wybodaeth hon arnom gan y bydd angen i ni gysylltu â’r unigolyn hwn i drefnu i ymweld â’r eiddo sy’n cael ei effeithio gan y gwrych.
2.5 Yr unigolyn sy’n berchen ar rydd-ddaliad yr eiddo yw hwn – nid cwmni rheoli. Dylai’ch cytundeb tenantiaeth neu brydles gynnwys y wybodaeth hon. Os na, gellwch wirio gyda’r Gofrestrfa Tir. Mae’r ffurflen berthnasol (313) ar gael ar y wefan (www.landregistry.gov.uk) neu gellwch ei chael o’ch swyddfa leol. Y gost ar gyfer y gwasanaeth hwn ar hyn o bryd yw £4 os ydych yn gwybod cyfeiriad post llawn yr eiddo.
Nid oes raid i chi fod yn berchen ar yr eiddo sy’n cael ei effeithio gan wrych uchel i wneud cwyn, ond dylech roi gwybod i berchennog yr eiddo beth ydych yn ei wneud.
3. Lleoliad y gwrych
Mae angen y wybodaeth hon arnom gan y bydd raid i ni gysylltu â’r bobl hyn i gael eu hochr nhw o’r stori a threfnu i ymweld â’r safle lle mae’r gwrych yn tyfu.
3.2 Fel rheol, yr unigolyn yr ydych wedi siarad â nhw i geisio datrys y sefyllfa yw hwn.
3.3 Os oes gennych unrhyw amheuon o ran pwy sy’n berchen ar yr eiddo, gweler y nodyn yng nghwestiwn 2.5 uchod.
4. Y gwrych
Darperwch lun o’r gwrych. Byddai’n gynorthwyol pe bai’r llun yn cynnwys unigolyn yn sefyll yn ymyl y gwrych er mwyn i ni gael syniad o’i faint. Mae angen hyn arnom i sicrhau bod y gwrych yn bodloni’r diffiniad cyfreithiol.
Darperwch gynllun hefyd sy’n dangos lleoliad y gwrych a’r tai cyfagos. Wrth lunio eich cynllun, edrychwch ar yr enghraifft isod a sicrhewch eich bod yn:
- Enwi’r ffyrdd perthnasol
- Nodi lleoliad eich tŷ a’r eiddo y mae’r gwrych yn tyfu ynddo. Dylech rifo neu enwi’r tai.
- Marcio lle mae’r gwrych yn glir a pha mor bell y mae’n ymestyn
Hyd yn oed os ydych wedi ticio’r holl flychau ‘ydy’ yn yr adran hon, nid yw’n golygu o reidrwydd bod y gwrych yn bodloni’r holl brofion cyfreithiol. Bydd dal angen i ni benderfynu a yw’r gwrych yn rhwystro golau rhag dod trwodd neu’n rhwystro unrhyw un – neu unrhyw beth – sy’n ceisio mynd heibio iddo. Dyna pam bod angen y llun arnom.
5. Sail y gŵyn
Byddai o gymorth i ni petaech yn darparu cymaint o wybodaeth â phosibl gan gadw at y ffeithiau. Canolbwyntiwch ar y gwrych a’r problemau ymarferol y mae’n eu hachosi trwy fod yn rhy uchel.
Ni allwn ystyried problemau nad ydynt yn ymwneud â maint y gwrych. Er enghraifft, os yw’r gwreiddiau’n gwthio llwybr i fyny.
Ni allwn ystyried unrhyw bethau nad ydynt yn ymwneud â’r gwrych dan sylw chwaith. Er enghraifft, bod pobl eraill yn torri eu gwrychoedd i fod yn llai neu bod poeni am y peth yn eich gwneud yn sâl.
Cynhwyswch gopïau o unrhyw adroddiadau proffesiynol yr ydych wedi’u paratoi. Os ydych yn cwyno bod y gwrych yn rhwystro golau, marciwch ba ffordd y mae’r gogledd ar eich cynllun (gweler y nodyn yn adran 4 uchod) a darperwch fesuriadau perthnasol (e.e. maint yr ardd, pellter rhwng y gwrych a’r ffenestri sy’n cael eu heffeithio). Rhaid i bob mesuriad fod mewn metrau (m) a chentimetrau (cm).
6. Cynigion blaenorol i ddatrys y gŵyn
Cadwch eich disgrifiadau’n gryno ond dywedwch sut y gwnaethoch gysylltu (e.e. wyneb yn wyneb, ffôn, llythyr) a beth oedd y canlyniad.
Enghraifft 1
13 Tachwedd 2004 – ffonio i ofyn a allem drafod y gwrych; cyfarfod ar 20 Tachwedd ond yn methu â chytuno ar ateb; 14 Rhagfyr – ymweliad gan gyfryngwyr; cynnal cyfarfod ar y cyd ond yn dal i fethu â chytuno ar ateb a oedd yn plesio pawb; 4 Ionawr 2005 – ysgrifennu i roi gwybod i’r cymydog fy mod am gwyno i’r Cyngor.
Enghraifft 2
13 Tachwedd 2004 – ysgrifennu i ofyn a allem drafod y gwrych; dim ateb pythefnos yn ddiweddarach; 4 Rhagfyr 2004 – ysgrifennu i ofyn a fyddai’n fodlon siarad â chyfryngwr; dim ateb pythefnos yn ddiweddarach; 18 Rhagfyr 2004 - ysgrifennu i roi gwybod i’r cymydog fy mod am gwyno i’r Cyngor.
Nid oes raid i chi anfon copïau o’r holl ohebiaeth gyda’ch cymydog am y gwrych – yn enwedig os yw’r anghydfod wedi bod yn mynd ymlaen ers amser maith. Dim ond tystiolaeth o’ch ymdrechion diweddaraf i ddatrys y sefyllfa sydd ei hangen.
8. Gwirio ac anfon
Sicrhewch eich bod wedi ticio’r holl flychau
Gwnewch eich siec yn daladwy i Cyngor Bwrdeistref Sirol Wrecsam.
Cysylltu â’r Cyngor
Gellwch gysylltu â ni am fwy o gyngor a thaflenni, neu i wneud cwyn ffurfiol:
Ffôn: 01978 292529
Ebost: planning@wrexham.gov.uk
Cysylltiadau i gyngor a chyfarwyddyd
Taflenni gwybodaeth (Cymerwyd o www.communities.gov.uk)
I weld ac argraffu ffeiliau pdf, rhaid i chi osod Adobe® Acrobat® Reader: cliciwch y logo isod i ddadlwytho'r meddalwedd.
Gellir newid dogfennau Adobe Acrobat yn ôl i destun plaen trwy ddefnyddio'r Gwasanaeth Newid Abobe.
Cysylltiadau allanol
 Adran Cymunedau a Llywodraeth Leol
Sy’n cynnwys llawer o wybodaeth am wrychoedd uchel.
Cyfryngu Cymru - www.cyfryngucymru.org.uk
I ddod o hyd i’ch Swyddfa Cyfryngu Cymunedol agosaf
Arolygiaeth Gynllunio Cymru
Gellwch gyflwyno apeliadau i Arolygiaeth Gynllunio Cymru
Bioamrywiaeth
Cynllunio
Amgylchedd
|
Yn ôl i'r brig