Gwasanaethau A-Y

Awgrymiadau Gyrru yn y Gaeaf

Gan dybio eich bod yn gorfod teithio, dylech ddilyn ychydig o awgrymiadau syml i wneud teithio yn y Gaeaf mor ddiogel ag y bo modd.

Sicrhewch y canlynol

Bod eich cerbyd wedi cael ei gynnal a’i wasanaethu a bod y batri’n un da. Mae eich batri’n gorfod gweithio’n llawer caletach yn y gaeaf (goleuadau a sychwyr, er enghraifft) a gall fethu’n gyfan gwbl heb fawr ddim rhybudd.
Bod dyfnder gwadnau’r teiars yn ddigonol a’u pwysedd yn gywir (gan gynnwys yr un dros ben).
Bod y system oeri’n cynnwys gwrthrewydd i’r cryfder cywir.
Bod sychwyr a golchwyr y sgrin wynt yn gweithio’n briodol.
Bod goleuadau’n lân ac yn gweithio.

Cadarnhau cyflwr y tywydd

Cael gwybodaeth am deithio a’r tywydd ar deledu a radio lleol a chenedlaethol.
Gweld bod holl ffenestri a drychau eich cerbyd yn glir o darth, rhew ac eira. Mae eira a rhew yn lleihau’r hyn y gallwch ei weld, ac yn gallu bod yn beryglus i ddefnyddwyr eraill y ffyrdd wrth ddisgyn oedi ar eich cerbyd.

Os bydd cyflwr y tywydd yn eithafol fel bwrw eira

Holwch eich hun a yw eich taith yn hanfodol?
Sicrhewch fod gennych danc llawn o danwydd.
Gewch i rywun gwybod i ble’r ydych yn mynd a phryd y disgwyliwch gyrraedd.
Ewch â ffôn symudol os oes gennych un, ond cofiwch y gallech dorri i lawr mewn “ardal farw”. Felly ewch â dillad cynnes, diodydd poeth, bwyd, esgidiau mawr, tortsh a rhaw yn ogystal - gallech orfod cerdded yn bell at ffôn.

Os ydych allan ar y ffyrdd mewn amgylchiadau gwael

Defnyddiwch y priffyrdd a raeanwyd gymaint ag y gallwch. Fel arfer mae map o’r ffyrdd y bydd Cynghorau’n eu graeanu ar eu gwefannau.
Dylech ganiatáu amser ychwanegol ar gyfer eich taith.
Dylech osgoi’r adeg brysur i leihau tagfeydd.

Yn gyffredinol, wrth yrru mewn tywydd gaeafol

Gyrrwch yn unol â’r amgylchiadau - ar ffyrdd a driniwyd a heb eu trin.
Arafwch os yw’n anodd gweld, pan fo eira, neu rhag ofn bod rhew wedi ffurfio.
Defnyddiwch y gêr uchaf a allwch i gynorthwyo cadw rheolaeth ar y cerbyd ac osgoi brecio a chyflymu garw.
Cadwch bellterau stopio mwy diogel - mae dwy eiliad rhwng cerbydau’n addas ar gyfer amgylchiadau da! Mae wyneb ffordd wlyb yn golygu y byddwch yn cymryd dwywaith y pellter i stopio, fel bod angen i chi fod o leiaf bedair eiliad ar ôl y cerbyd o’ch blaen.
Defnyddiwch oleuadau wedi’u gostwng pan fydd gwelededd yn wael ac mewn eira, fel bod pobl eraill yn gallu eich gweld!
Defnyddiwch oleuadau niwl ôl pan fydd gwelededd yn wael ond cofiwch eu diffodd pan fydd amgylchiadau’n gwella.
Cadwch olwg am ddefnyddwyr eraill y ffyrdd, gan gynnwys beiciau modur, beiciau, cerddwyr a phlant. Fe all fod yn anodd iddynt hwythau hefyd dan yr amgylchiadau.

Os byddwch yn torri i lawr

Os byddwch yn mynd i drafferthion, arhoswch gyda’ch cerbyd os gallwch nes bydd cymorth yn cyrraedd.
Os byddwch yn gorfod gadael eich cerbyd, gwnewch eich hun yn weladwy i eraill.
Os byddwch yn gorfod gadael eich cerbyd, rhowch y manylion i’r heddlu lleol a pharcio’n ddiogel i osgoi rhwystro cerbydau cynnal a chadw fel erydr eira wrth iddynt geisio trin y ffyrdd.

Cyngor ar gyfer amgylchiadau tywydd arbennig

Mae niwl yn berygl arbennig yn yr hydref a’r gaeaf, ac yn un o brif achosion gwrthdrawiadau.

Arafwch, cadwch yn ddigon pell, a defnyddio goleuadau mewn niwl.
Gyrrwch yn araf iawn gan ddefnyddio goleuadau wedi’u gostwng. Defnyddiwch oleuadau niwl os yw’n anodd iawn gweld, ond cofiwch eu diffodd pan fydd gwelededd yn gwella.
Peidiwch â dilyn goleuadau ôl y cerbyd o’ch blaen yn rhy agos - mae hyn gwneud i chi deimlo’n ddiogel ar gam ac yn golygu y gallwch fod yn gyrru’n rhy agos.
Peidiwch â chyflymu’n sydyn - hyd yn oed os yw’n ymddangos bod pethau’n gwella, gallwch gael eich hun yn ôl mewn niwl trwchus yn ddirybudd.

Mae rhew, eira a slwtsh yn lleihau gallu eich teiars i afael yn y ffordd yn fawr iawn, sy’n golygu bod arafu, cyflymu neu newid cyfeiriad i gyd yn beryglus. Dan yr amgylchiadau hyn, y tric yw gyrru mor esmwyth ag y gallwch.

Gyrrwch yn araf, gan adael lle ychwanegol i arafu a stopio.
Gall gymryd dengwaith yn hwy i stopio dan amgylchiadau rhewllyd nag ar ffordd sych.
Defnyddiwch y gêr uchaf a alloch i osgoi troelli’r olwynion, peidiwch â newid cyfeiriad na brecio a chyflymu’n sydyn.
I frecio ar rew ac eira heb gloi eich olwynion, ewch i gêr isel yn gynharach nag arfer, gadael i’ch cyflymder ostwng, a defnyddio’r brêc yn dawel fach.
Os byddwch yn sglefrio, tynnwch eich troed oddi ar y cyflymydd ond peidiwch â brecio’n sydyn.

Llifogydd: Mae’n well peidio â mynd i lifddwr o gwbl - os gallwch chi fynd ar ffordd arall, gwnewch hynny. Os byddwch yn mynd i lifddwr:

Gyrrwch yn araf yn y gêr gyntaf, ond cadwch gyflymder y peiriant yn uchel trwy lithro’r cydiwr - bydd hyn yn eich cadw rhag nogio.
Ewch drwy’r dŵr un cerbyd ar y tro.
Ceisiwch osgoi’r dŵr dyfnaf, sydd ger y pafin fel arfer. Peidiwch â cheisio croesi os yw’r dŵr yn edrych yn rhy ddwfn. Gwyliwch geir eraill!
Cofiwch brofi eich brêcs ychydig o weithiau ar ôl i chi ddod allan o’r llif cyn gyrru ar gyflymder arferol.

Cofiwch

Sicrhau rhoi lle ychwanegol i feicwyr a beicwyr modur ar dywydd garw.
Mae disgleirdeb haul isel y gaeaf yn gallu bod yn beryglus. Ewch â sbectol haul yn y car rhag ofn ei fod yn rhy isel i’r cysgod llygaid.
Mae’n cymryd dwywaith y pellter i stopio ar ffordd wlyb ag ar un sych, a hyd at ddengwaith mwy dan amgylchiadau rhewllyd.